Vai a sottomenu e altri contenuti

Crèsia de Santa Bràbara

Sa crèsia intitulada a Santa Bràbara de Nicomedia est istada fraigada dae sa zente de s'antiga biddighedda de Ruinas, chi fiat a fundu de sa crèsia.

Ruinas benit numenada in su 1242 in su Cundaghe de Santa Maria de Bonacatu, in s'ischeda nr 32, cun custas paràulas: ''bau de Ruinas''. In s'ischeda 19 est numenada ''bia qui benit ad Orruinas''.
Custu caminu, chi andat cara a Santa Maria e chi como est isfaldadu, est tzerriadu ''Caminu Crecu ‘e Pischinas''. Inoghe fiat passadu su Pìscamu Visconti andende dae Bonarcadu a Ottana, pro calare a sa domestia de Olmetum o Mura Ulmos, in ue fiat abarradu sa note de su 31 de maju 1263; fiat arribadu a Ottana su sàbadu, vizìlia de sa Pasca de Maju.
Si b'aiat unu caminu de passazu obligadu a canta a Ruinas, cheret nàrrere chi fiat una bidda de importu, finas pro sos terrinos ricos chi sos de sa famìglia Arborea teniant a fundu a in ie.

De Ruinas oe abarrant solu pedras e cantos de luzana destruidas dae sos traballos fatos in sos sartos in sos sèculos a pustis. Sas cosas prus importantes chi nos abarrant de Ruinas sunt duas funtanas fatas a canta a sa roja, tzerriat benas de Santa Bràbara dae sa zente.
Sos religiosos chi abarraiant in ie pro sas noinas nde leaiant s'abba pro sos bisonzos de onni die finas a cando, gràtzias a su Comune, no est arribada s'abba de s'acuedotu. Narant chi sas abbas de custas funtanas sunt bellas pro sanare sa zente, comente benit finas candadu in sos gosos: ''Cun cuss'abba meighinosa-ch'azzis in sa domo bostra''.

Fortzis fiat istada sa pesta niedda a nche fàghere fuire sa zente dae Ruinas e a nche dda fàghere andare a Aidumajore in ue, galu oe, b'est su cultu pro sa màrtire de Nicomèdia.

torna all'inizio del contenuto
torna all'inizio del contenuto