Vai a sottomenu e altri contenuti

S'istòria de Aidumajore

Aidumajore est unu tzentru agro-pastorale postu in una badde suta de sa prana de Abbasanta. Amparadu dae sos bentos e inghiriadu dae buscos, est a 250 metros subra su de su mare, in unu territòriu saliosu.

Su nùmene de sa bidda benit dae sa positzione zeogràfica. Aidumajore cheret nàrrere ''brincadorzu majore'' o ''passazu printzipale'' e ìnditat su passazu pretzisu intre sa campeda de Ilartzi e su Barigadu.

Sa prima zente est arribada a inoghe cara a su 1015-1016 cando unos cantos pastores, chi fortzis beniant dae sos bidditzolos nuràzicos de Sanilo e Sa Bastia, aiant detzisu de mòvere cara a sa campeda de Abbasanta, a ddos atràere fiat fortzis s'amparu naturale de sos montigos chi fiant totu a inghìriu.
A custos grupos si fiant atzuntos, cara a su 1400, sos chi si fiant sarvados de s'antiga villa zuigale de Ruinas, destruida dae sa peste niedda, chi fiant in chirca de unu logu prus sanu pro bìvere.

In su medioevo Aidumajore faghiat parte de sa curadoria de su Guilcier, de su Regnu ''o zuigadu'' de Arborea, chi allacanaiat cun su Regnu de Torres; galu oe, una parte de su territòriu de Aidumajore benit tzerriadu ''Monte Arboree''. Su nùmene ''Aidu'' (ghenna, passazu) dd'agatamus in su tratadu de paghe de su 1388 fatu tra sa domo de Aragona e sa Corona de Logu de su Regnu de Arborea. Sas testimoniàntzias istòricas de su medioevo sunt, pro su prus, religiosas; si sunt costoidas bene gràtzias a sas curas de sos fideles.

Cara a sa fine de su 700 finas Aidumajore teniat propriedàrios terrieros, cussos matessi propriedarios chi, in cussu tempus, Giovanni Maria Angioy non s'istracaiat de cumbàtere. Regordamus sos Pitzalis, Marras, Vidili e Sanna.

Tocat a ammentare finas unu fràigu de sa prima metade de s'800: unu palatzu de duos pianos, prus artu de sas àteras domos de sa bidda. Su mere fiat Don Bachisio Pitzalis chi aiat isposadu sa Dama de corte, Donna Mariantonia Natter Satta. Pro custa resone sa zente de Aidumajore tzerriat cussu palatzu, galu oe, ''su palatzu de sa dama''. A s'ora biviant in Aidumajore casi 1500 pessones; fiat una bidda pòbera e sena peruna forma de organizatzione sotziale e non teniat servìtziu perunu. Pro nde tènnere, fiat tocadu a ispetare s'incumintzu de su de su 1900.
In su 900 sennor Luigi Sanna aiat lassadu a su Comune su palatzu in ue oe b'est sa domo comunale e sa domo de su predi.
Giuseppe Sotgiu, cando fiat Sìndigu, aiat fatu fàghere su càntaru cun su samundadorzu de ''Cortejosso''. Cust'òbera, paris a su cantaru de ''Binzale'' e a su putzu de ''Cortesusu'', aiat asseguradu a Aidumajore s'abba pro bufare pro semper.

S'Amministratzione comunale, ghiada dae sennor Francesco Michele Spada, aiat fatu fàghere sa cobertura a su samunadorzu de ''Cortejosso'', s'impedradu a totus sas istradas de sa bidda, s'istrada Aidumajore-Ispinedu e aiat postu a disponimentu unu terrinu comunale pro vatzinare su bestiàmene.
In su 1912 su Comune aiat cumandadu su campanile nou e sa torrada a nou de sa crèsia de Santa Maria de sas Prammas. Est, imbetzes, de su 1916 su càntaru ''Binzecaddu'' cun s'abbadòriu pro su bestiàmene.
In su 1925 fiat istada furada e ochida una pitzinna de 12 annos, Vanda Serra, fiza de su Sìndigu de Aidumajore: aiant pedidu 30 miza francos pro dda torrare a sa famìglia.

Sa lughe dd'aiant posta in su 1934 e in sos annos 1935-36 aiant fraigadu sas iscolas elementares e mèdias in ue in antis bi fiat sa Crèsia de Santu Zorzi e su campusantu.
Sunt de su 1953 s'istrada pro Bòrore e sa Crèsia de Santa Maria de sas Gràtzias sende chi, in su 1955, sunt incumentzados sos traballos pro s'asilu, agabados oto annos a pustis.
In sos annos '60 est istada fata sa retza de s'abba e intre su 1966 e su 1974 s'asfaltu de sas istradas.

In sos annos a pustis sunt istadas fatas custas òberas:

  • un impiantu modernu pro sa lughe pùblica;
  • sa trivelladura de unos cantos putzos artesianos chi ant postu fine a su problema de s'abba;
  • su pianu de zona, chi at dadu a paritzos zòvanos sa possibilidade de si fraigare sa domo;
  • sos ripetidores pro sa televisione, fatos fàghere dae unu cumitadu de tzitadinos (in antis de su 1979 sos programmas de sa RAI si bidiant male meda pro sa positzione de Aidumajore; cun sos ripetidores si leaiat non solu sa Rai ma finas emitentes privadas;
  • su campu de calceto e sa torrada a nou e illuminatzione de su campu isportivu;
  • sa lughe in sos sartos;
  • paritzas istradas de sartu sunt istadas fraigadas o torradas a nou;
  • su fraigu de su tzentru de agregatzione sotziale, inchinzadu dae pagu, e àteras òberas chi faghent de Aidumajore (in ue oe bi bivet su de tres unu ebbia de sas pessones chi bi fiant in su 1800) unu tzentru modernu e funtzionale.

torna all'inizio del contenuto
torna all'inizio del contenuto